തുറസ്സായ സ്ഥലങ്ങളിലെ തൊഴിൽ വിലക്ക് ലംഘിച്ച 388 നിർമ്മാണ സൈറ്റുകൾക്കെതിരെ നടപടിയുമായി ഖത്തർ തൊഴിൽ മന്ത്രാലയം. വേനൽച്ചൂടിൽ നിന്നുള്ള സൂര്യാഘാതവും ആരോഗ്യ പ്രശ്നങ്ങളും തടയുന്നതിനായാണ് ഖത്തർ ഉച്ചസമയങ്ങളിൽ തൊഴിൽവിലക്ക് ഏർപ്പെടുത്തിയത്. ജൂൺ ഒന്ന് മുതൽ സെപ്റ്റംബർ 15 വരെയുള്ള കാലയളവിൽ നടത്തിയ പരിശോധനകളിലാണ് ചിലയിടങ്ങളിൽ നിയമലംഘനങ്ങൾ കണ്ടെത്തിയത്. നിയമ നടപടികളുടെ ഭാഗമായി ഈ ജോലി സ്ഥലങ്ങൾ മൂന്ന് ദിവസത്തേക്ക് അടച്ചിടാൻ അധികൃതർ ഉത്തരവിട്ടു.
തൊഴിലാളികളുടെ ആരോഗ്യത്തിനും സുരക്ഷയ്ക്കും ഭീഷണിയാകുന്ന നടപടികൾക്കെതിരെ യാതൊരു വിട്ടുവീഴ്ചയുമില്ലാതെ കർശന നടപടിയെടുക്കുമെന്ന മന്ത്രാലയത്തിന്റെ ഉറച്ച നിലപാടാണ് ഈ നടപടിയിലൂടെ വ്യക്തമാകുന്നതെന്ന് അധികൃതർ അറിയിച്ചു. സുരക്ഷാ മാനദണ്ഡങ്ങൾ പാലിക്കാത്ത സ്ഥാപനങ്ങൾക്കുള്ള മുന്നറിയിപ്പാണ് ഈ നടപടിയെന്നും തൊഴിലാളികളുടെ സുരക്ഷ അപകടത്തിലാക്കുന്ന സംഭവങ്ങളിൽ യാതൊരു ഇളവും നൽകില്ലെന്നും തൊഴിൽ മന്ത്രാലയം കൂട്ടിച്ചേർത്തു.
സമാനമായ രീതിയിൽ യുഎഇയിലും വേനൽക്കാലത്ത് 'ഉച്ചവിശ്രമ നിയമം' കർശനമായി നടപ്പിലാക്കി വരുന്നുണ്ട്. വർഷം തോറും ജൂൺ 15 മുതൽ സെപ്റ്റംബർ 15 വരെ ഉച്ചയ്ക്ക് 12:30 മുതൽ 3:00 മണി വരെ നേരിട്ട് വെയിലേൽക്കുന്ന തുറസ്സായ സ്ഥലങ്ങളിൽ ജോലി ചെയ്യുന്നത് യുഎഇ വിലക്കുന്നുണ്ട്. കഠിനമായ ചൂടുള്ള സമയങ്ങളിൽ പുറം ജോലികളിൽ ഏർപ്പെടുന്ന തൊഴിലാളികളുടെ സുരക്ഷ ഉറപ്പാക്കാനാണ് ഗൾഫ് രാജ്യങ്ങൾ ഇത്തരം സുരക്ഷാ നിയമങ്ങൾ ഏർപ്പെടുത്തുന്നത്.
Content Highlights: Qatar’s Ministry of Labour recorded 644 violations and ordered 388 non-compliant work sites to close for three days during the 2026 Heat Stress Prevention Campaign. The inspections focused on compliance with the summer ban on outdoor work during peak heat hours.